En in chagliom in toc sut la via veglia e mo malamain cuvrì vi giascha in cadaver uman sternì! Ins ha spert constatà ch'i sa tracta dad ina vaiva da 37 onns en il quart u tschintgavel mais da gravidanza.
Rico Tambornino descriva in schabetg commovent da l'onn 1847, cun dialogs e persunas per part inventadas, sa tegn dentant uschè lunsch sco pussaivel vid ils protocols da dretgira ed artitgels publitgads en las gasettas da lezs temps.
La segunda part dal cudesch cuntegn raquints e regurdientschas ord l'uffanza da l'autur en la Casa Pajarola a Trun. Ina chasa da trais auzadas, in surchombras misterius e stgirs e profunds tschalers, dasperas in clavà cun uigls e pastrign; ina chasa plain vita, cun blers augs ed anc pli bleras ondas.
